Kreu i Shtetit, Ilir Meta ka përcjellë një tjetër reagim në lidhje me buxhetin e vitit 2022, ku e cilëson antisocial. Sipas tij, me këtë buxhet rritet fondi total i PPP-ve, ndërsa për qytetarët që jetojnë me të ardhura nën 5.5 USD sjell zero rritje.
Presidenti i Republikës, Ilir Meta, ka dekretuar më 10 dhjetor kthimin në Kuvend të buxhetit për vitin 2022. Në shpjegimin e dhënë nga Kreu i Shtetit thuhet se buxheti është “antisocial, ka mangësi shqetësuese të transparencës në lidhje me shpenzimet dhe politikat fiskale, si dhe paraqet problematikë shumë shqetësuese në lidhje me nivelin e borxhit publik, përdorimit dhe efektit ekonomik të tij”.
Sipas tij, buxhetit i mungon mbështetja reale për sektorët e ekonomisë, në mënyrë të veçantë për bujqësinë.
Sakaq, Partia Socialiste ka vendosur të rrëzojë në seancë plenare dekretin e presidentit, Ilir Meta, i cili ktheu buxhetin e 2022.
Gjatë një konference për mediat, kreu i grupit Taulant Balla deklaroi se Grupi Parlamentar Socialist do të rrëzojë dekretin e presidentit për kthimin e Buxhetit të Shtetit 2022, duke i hapur rrugë hyrjes në fuqi buxhetit më të madh në historinë e Shqipërisë.
Sipas Ballës, “Buxheti i Shtetit 2022 mundëson vazhdimin e financimit të reformave, sigurimin dhe përmirësimin e shërbimeve publike, forcimin e drejtësisë sociale dhe zgjerimin e paketës sociale për të gjithë shtresat në nevojë, si dhe sigurimin e investimeve të domosdoshme për zhvillimin e mëtejshëm të sektorëve strategjikë dhe ekonomisë së vendit”.
Postimi i Metës
“Buxheti 2022” ËSHTË ANTISOCIAL.
RRITET fondi total i PPP-ve nga 636.8 miliard lekë, në 830.9 miliard lekë.
ZERO rritje reale për 930,457 qytetarë, që jetojnë me të ardhura nën 5.5 USD.
