Kryeministri Edi Rama ka qenë shumë i ashpër në qëndrimin e tij për protestat e këtyre ditëve, e kryesisht përdorimin e të miturve. Nga ana tjetër, ai ka marrë në mbrojtje, si rrallë herë, kreun e PD-së, Lulzim Basha.
Mjaft i drejtpërdrejtë në konferencën për media, ai shigjetoi presidentin Meta dhe ish-kryeministrin Berisha, të cilët për të, janë shtysa e vetme që Basha bën lëvizje të tilla. Kryeministri Rama u shpreh se kryedemokrati Basha nuk ka gisht në këto që po ndodhin, me theks të veçantë në protestat për vrasjen e Klodian Rashës.
Rama thotë se Basha duhet të distancohet nga protestat e dhunshme, dhe se këto lloj protestash janë akt i degradimit të Ilir Metës dhe Sali Berishës.
“Këta duan të vazhdojnë ciklin e revolucionit imagjinar që rrotullohet në rrodakën e Ilir Metës dhe Saliut. Më vjen keq për Bashën, se kjo gjë provon se ai nuk ka asnjë pikë karakteri. Unë jam i bindur se ai nuk ka lidhje me këto që ndodhin.
Por kjo nuk e bën të pafajshëm, por dyfish fajtor. Duhet të dilte e të thoshte që kjo nuk është rruga e duhur. Por si gjithmonë, ai është i pranishëm dhe mungon për të thënë gjënë e duhur në vendin e duhur”.
