Rreth 1500 forca policie do të angazhohen për zhvillimin e protestës, që pritet të nisë përballë godinës së Kryeministrisë. Organizatorët kanë lajmëruar uniformat blu se protesta do të zgjasë deri në mesnatë, në orën 23 e 59 minuta. Për shkak të situatës së tensionuar gjatë ditëve të fundit, policia ka shtuar mjetet në gatishmëri, si dhe numrin e forcave speciale.
Prej orëve të para të ditës, godina e Kryeministrisë është rrethuar me gardhe metalikë, pas të cilit do të qëndrojë kordoni i policëve që do të sigurojë perimetrin e ndërtesës. Ashtu si në protestat e mëparshme, shtyllat ndriçuese janë lyer me graso, për të penguar protestuesit që mos dëmtojnë kamerat e sigurisë që janë vendosur mbi to.
Por edhe Kuvendi ka të njëjtën nivel sigurie. Muri përreth Parlamentit është rrethuar me tel me gjemba. Ndërsa në sheshin përballë janë vendosur mbrojtëse metalike, për të penguar hyrjen e protestuesve në ambientet e brendshme.