Sa i takon protestës së djeshme, uniformat blu kanë shpallur në kërkim Arkimed Lushajn, i njohur me emrin artistik ‘Stresi’. Sipas “News24”, po ashtu janë arrestuar deri më tani 3 persona dhe janë proceduar 4 të mitur. Personat e mësipërm, të cilët së bashku me mijëra të tjerë dolën në tubim për vrasjen e Klodian Rashës, sipas policisë, nuk morën leje për protestën si dhe shkelën rregullat anti-covid.
Paraditen e djeshme ishin të rinjtë e FRPD, që nisën një marshim protestë tek Ministria e Brendshme dhe vijuan përgjatë bulevardit deri në Kryeministri. Protesta agravoi pasdite, teksa protestuesit kanë qëlluar me çadra drejt Ministrisë së Brendshme për të hyrë brenda, por policia ka ndërhyrë menjëherë.
Qytetarët me pankartat “Unë jam Klodiani”, dogjën maskat e tyre në shenjë proteste për këtë ngjarje të rëndë dhe thirrën në kor kërkesën për dorëheqjen e ministrit Sandër Lleshaj dhe drejtorit të policisë, Ardi Veliu. Protestuesit iu drejtuan dhe Kryeministrisë, ku i vunë flakën pemës në krah të saj. Po ashtu sulmuan kordonin e policisë, ku disa prej protestuesve u shoqëruan për në komisariat. Disa të tjerë shkulën pllakat e bulevardit dhe efektivët hodhën spraj djegës.
