Qindra sarandjotë janë nisur drejt Tiranës për të marrë pjesë në protestën e opozitës. Rreth 400 persona janë nisur nga Saranda, Konispoli dhe Finiqi, për t’iu bashkuar protestës së sotshme.
Nisja e qytetarëve është bërë që në 04:00 të mëngjesit, për shkak të largësisë, ndërsa në dispozicion janë vënë dy autobusë dhe makina të vogla.
Ndërkohë, sipas burimeve të News 24 nga selia e PD, Delvinë, rreth 50 është numri i demokratëve që janë nisur mëngjesin e së shtunës nga Delvina për të marrë pjesë së protestë.
Por, duket se sarandjotët janë ndarë më dysh, teksa një pjesë e mirë e tyre janë nisur po mëngjesin e kësaj të shtune drejt Vlorës për të marrë pjesë në mitingun e organizuar nga kryeministri Rama.
Mësohet se rreth 500 persona janë nisur drejt Vlorës, ndërsa rreth 180 socialistë janë nisur nga Delvina.
Ndërkohë në orën 6 e gjysmë është bërë nisja e protestuesve nga Vlora drejt Tiranës. Në dispozicion të qytetarëve vlonjatë janë vënë 10 autobusë në pika të ndryshme të qytetit të Vlorës si dhe rreth 60 automjete të vogla. Autobusë janë vendosur edhe në fshatrat e Vlorës. Të konfirmuar nga PD Vlorë 1800 persona nga qyteti dhe rrethinat, fshatrat dhe zonat përreth janë nisur këtë të shtunë drejt Tiranës për protestën e opozitës.
