Sekretari i Përgjithshëm i LSI-së, Endrit Braimllari ka lëshuar një paralajmërim të fortë për protestën e sotme të opozitës së bashkuar para Kryeministrisë.
Në një intervistë për Shijak TV, ish-deputeti tha se shqiptarët vendosin sot për fatin e tyre kundër një kryeministri antikombëtar.
Po ashtu, Braimllari paralajmëroi për një pjesëmarrje si kurrë më parë.
“Qytetarë anë e mbanë vendit i janë drejtuar Kryeministrisë. Uragani popullor është i pandalshëm. Nga informacionet që kemi pjesëmarrja do jetë masive dhe si kurrë më parë. Qytetarët tanimë i janë drejtuar Kryeministrisë.
Urrejtja ndaj një Kryeministri që ka varfëruar vendin, ka larguar të rinjtë, ka vrarë shpresën se ky vend mund të bëhet, është i pandalshëm. Protesta është popullore dhe ka të bëjë me ekonominë. Shqiptarët po varfërohen çdo ditë, biznesi po shkatërrohet nga taksat e larta dhe gjobat e Edi Ramës. Siguria publike është në mëshirë të fatit. Cenohet siguria kombëtare duke u sulmuar i vetmi aeroport ndërkombëtar në vend dhe nuk ka asnjë përgjegjës.
Kemi të bëjmë me një qeveri të papërgjegjshme, arrogante, antikombëtare kundër interesit qytetar.
Qytetarët sot vendosin fatin e tyre kundër një Kryeministri antikombëtar”, tha ndër të tjera ish-deputeti.
