Shqiptarët janë thirrur sërish në shesh nga opozita. Edi Rama po qeveris keq. Njerëzit janë të revoltuar. Por a ngjall shpresë alternativa që u ofrohet? Gjatë turit në rrethe, Lulzim Basha u ndesh me qytetarët. Ata dyshojnë ende mbi paktin e tij të errët të 17 Majit me Edi Ramën.
Disa as denjuan ta takojnë, të tjerët i përplasën në sy vjedhjet në Rrugën e Kombit. PD denoncoi me të drejtë kanabizimin e vendit dhe kriminalizimin e parlamentit vitet e fundit.
Por bashkë me LSI-në, bëri çmos të pengonte apo vononte reformën në drejtësi. Pavarësisht të metave, kjo e fundit ka nisur të çmontojë sistemin klientelist e tejet të korruptuar të gjyqësorit. Skandali i fundit me gjyqtarët e Dritan Dajtit, tregon se në këtë vend gjyqtarin nga krimineli, nuk e ka ndarë thuajse asgjë, dhe i ka bashkuar paraja.
Basha dhe Kryemadhi, premtojnë të heqin Ramën, për të riardhur vetë në krye të “tepsisë”. Deri më sot, ata nuk u kanë treguar shqiptarëve gjë tjetër, veçse që dinë ta mbrojnë mire, dhe me çdo kusht veten e tyre, nga një drejtësi realisht e pavarur, që është ende në ndërtim e sipër, dhe që pritet të testohet nëse është vërtet e tillë.
Prandaj sot, në podium apo shesh, shumëkush do të fryjë thjesht dufin, pa asnjë shpresë në horizont…
