Gjykata e Tiranës ka lënë të lirë të gjithë të arrestuarit e protestës së 5 marsit. Lirimi i tyre u bë me arsyetimin se nuk ka prova bindëse ndaj të akuzuarve.
Bëhet fjalë për Lorenc Bezati, Ervis Gaspri, Adi Mecja, Ervin Ceka, Lulzim Daci, Armando Prendi, Miklovan Ndreu dhe Nikoll Cepa. Sipas policisë, këta persona gjatë tubimit kanë kundërshtuar, goditur me mjete të forta e lëndë plasëse (gurë, shkopinj, fishekzjarre etj.) punonjësit e policisë, të vendosur me shërbim në ambientet përreth Kuvendit të Shqipërisë.
Ata u arrestuan në flagrancë nga policia, me akuzën për kryerjen e veprave penale “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetësisë publike”.
Prokurori kërkoi caktimin e masës së sigurisë “Arrest në burg” për të 8 të ndaluarit, por mbrojtja e konsideroi arrestimin të paligjshëm, që bëhet për të trembur njerëzit dhe të mos marrin pjesë në protesta.
