Partia Demokratike ka bërë propozimin e tretë sa i takon formulës së trupave të Komisionit Qendror të Zgjedhjeve, pas refuzimit të PS. Ky propozim vjen pas afatit të lënë nga bashkëkryetari i Reformës Zgjedhore, Damian Gjiknuri. Sipas selisë blu, përzgjedhja bëhet në një komision parlamentar, ku opozita do të ketë një përfaqësues të vetin me të drejtë vetoje.
Ky përfaqësues zgjedh 2 nga 5 anëtarë të Rregullatorit dhe 2 nga 5 anëtarët e Komisionit të Apelimit e Sanksioneve. Shumica zgjedh 3. Më pas Kuvendi miraton ose rrëzon në bllok të 5 të përzgjedhurit.
Për Komisionerin, PS zgjedh 4 kandidatë, Përfaqësuesi i Opozitës Politike përjashton 2 dhe Kuvendi zgjedh 1 nga 2 të mbeturit. Formula për trupën e KQZ është ajo që ndan opozitën dhe mazhorancën në tryezën e Këshillit Politik, nga ku pritet të finalizohet edhe drafti për Reformën Zgjedhore. Tashmë pritet të shihet nëse ky propozim i ri do të arrijë të marrë votën pro nga mazhoranca në tryezën e Këshillit Politik.
Mbrëmjen e djeshme, emisioni “Repolitix” trajtoi reformën zgjedhore dhe propozimin e ri të opozitës jashtë parlamentare për formulimin e KQZ-së.
Nënkryetari i KQZ, Denar Biba, në lidhje me propozimin e ri të PD-së për përbërjen e KQZ, tha se është i njëjti me atë që u arrit gjatë marrëveshjes së 5 qershorit. “KQZ nuk ka një efekt të drejtpërdrejtë në zgjedhje, në krahasim me atë që ndodh në qendrat e votimit dhe me formulën e sotme që solli PD është e njëjtë me atë që u vendos në marrëveshjen e 5 qershorit, pra përfundimisht KQZ është politik. Nëse deri sot nuk duhet të ishe një person politik, sot duhet të jesh një ish-drejtues politik, ish-drejtues i lartë apo i kabineteve qeveritare”, tha Biba.
Ai shtoi më tej se e shikon të pamundur votën e emigrantëve në këto kushte, dhe se për të do të duhet kohë. Denar Biba tha se në Shqipëri problematika me votën e emigrantëve është krejt e ndryshme nga vendet e tjera, pasi shqiptarët që jetojnë brenda dhe ata jashtë vendit janë thuajse gjysmë për gjysmë dhe vota e emigrantëve do të ndryshonte totalisht dhe përbërjen dhe konceptin e parlamentit me 140 deputetë.
“Emigrantët mund të votojnë vetëm me një sistem tjetër zgjedhor. Çdo lloj vendi i cili ka adoptuar votën e emigranteve, asnjëri prej tyre nuk ka problematikën shqiptare të një numri të jashtëzakonshëm që është gati 50 me 50 me shqiptarët që janë jashtë dhe brenda. Në një përqindje kaq të lartë, atëherë duhet të kuptojnë një parlament tjetër me 140 deputetë. Gjërat le të nisin si proces qoftë dhe duke nxitur debate të këtij karakteri, por unë besoj se nuk do të ndodh votimi i emigrantëve”, tha Biba.
Nënkryetari i KQZ aktuale, Denar Biba, u shpreh më tej se përmes teknologjisë biometrike, do të bëhet identifikimi biometrik i zgjedhësve dhe ajo do të bëhet me shenjat e gishtit. Pasi është i vetmi sistem që shteti shqiptar ka në databazet e tij. Biba beson se kjo do të jetë e mundur të realizohet në zgjedhjet e ardhshme, dhe se largon mundësinë e votimit dy herë. “Koncepti biometrik nënkupton që shkojë nga retina e syrit, elementet e fytyrës dhe gjurmët e gishtit. Më i liri është ai me gjurmë gishti dhe i vetmi i mundshëm në Shqipëri pasi i vetmi databaze që disponon shteti është përmes tyre nga ID dhe pasaportat. Ne nuk kemi ende të dhënat për retinë dhe elementet e fytyrës. Nëse kjo do të realizohet dhe besoj se do të ndodh, do të ketë një pajisje dhe me vendosjen e gishtit dhe do të identifikohet dhe do të jetë e pamundur të votohet dy herë. Kjo pasi emri do të jetë vetëm në një pajisje, dhe nuk voton dot në një vend tjetër”, tha Biba.
Konstitucionalisti Shkëlqim Hajdari, u shpreh mjaft i prerë në qëndrimin e tij, duke thënë se nuk bëhet fjalë për një reformë.
“Kjo mënyrë rregullimi, është e njëjta gjë. KQZ mbetet politik. Po atë punë që e bëjnë 7, e bëjnë 12. Përderisa nuk depolitizuan komisionet e numërimit, atje lart nuk do ishte ndonjë gjë.
KQZ siç është ose siç do bëhet, nuk është institucioni që ka prishur zgjedhjet në Shqipëri. Zgjedhjet prishen tek vota që delegohet, tek vota që blihet, tek financimi i ligjshëm ose i paligjshëm i partive politike, tek devijimi i votës nëpërmjet vjedhjes dhe tek listat e mbyllura.
Nëse do zgjidhim këto problemet poshtë, që të gjejmë një formulë tjetër, nëse do shkonim tek një sistem tjetër zgjedhor, atëherë në KQZ s’do kishte nevojë. Atje mund të cekojë noterët e Shqipërisë. Certifikimi do bëjë KQZ nëse do bëhet votimi elektronik, listat i ke të hapura”.
Kur është certifikues misioni i KQZ, pse ka kaq ngërç?
“Opozita ka kërkuar që të kontrollojë politikisht zgjedhjet poshtë. Do kërkojë edhe lart që të ketë të njëjtën kontroll politik. Kjo nuk është reformë! Reforma është që sondazhet që bëjnë mediat në shqipëri, 90 përqind e shqiptarëve kërkojë një formulë tjetër, reformë tjetër. Sot është fitore e madhe që ata që krijojnë vetëdije demokatike në Shqipëri, bien dakord që ky sistem ka vdekur, numërimi politik është sistem i vdekur, është i kotë. S’kanë bërë reformë!”, tha më tej ai.
