Në kuadër të dekriminalizimit, raportohet se ka përfunduar verifikimi për kreun e PSD-së Tom Doshi. Prokuroria e Përgjithshme bën të ditur se ka mbyllur hetimet dhe ka miratuar rezultatin e verifikimit për Tom Doshin. Duke iu referuar njoftimit zyrtar, Prokuroria e Përgjithshme deklaron se ia ka përcjellë dosjen Komisionit Qendror të Zgjedhjeve, si organ kompetent. Në zgjedhjet e fundit parlamentare, partia PSD e Tom Doshit, mori tre mandate. Vetë Tom Doshi hoqi dorë nga mandati i deputetit.
“Sektori i Dekriminalizimit prane Prokurorisë së Përgjithshme, ka miratuar rezultatet e verifikimit për subjektin Tom Gjek Doshi dhe ia ka përcjellë sot më 04.11.2021 Komisionit Qendror të Zgjedhjeve, i cili si organ kompetent në zbatim të nenit 12 e 13 të Kreut V të Vendimit të Kuvendit nr.17/ 2016, duhet të shqyrtojë nëse janë evidentuar të dhëna që përfshihen në sferën e kufizimeve të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, dhe në vijim të vlerësojë nëse ato janë brenda periudhës së ndalimit të përcaktuar në po këtij ligji”.
