Kryetari i Prizrenit, Mytaher Haskuka, njoftoi se në komunën që ai drejton janë konfirmuar edhe 14 raste të reja me COVID-19.
Haskuka citoi një raport të Institutit Kombëtar të Shëndetit Publik në Kosovë.
“Të gjitha këto raste kanë rrjedhur nga kontaktet e rasteve të mëparshme në komunën tonë. Tani, numri total i rasteve aktive me COVID-19 në Prizren është 19”, tha Haskuka.
“Menjëherë pas pranimit të raportit nga Instituti Kombëtar i Shëndetësisë Publike, u dakorduam me ministrin [v.j. në detyrë] të Shëndetësisë, Arben Vitia, që Prizrenin ta shpallim zonë karantinë”, tha Haskuka.
Më herët, Valbon Krasniqi, infektolog në Klinikën Infektive në Qendrën Klinike Universitare të Kosovës, tha se në këtë institucion janë konfirmuar edhe pesë pacientë me COVID-19.
Shifrat e reja e rrisin në 302 numrin total të të infektuarve në Kosovë, shkruan “Rel”.
