Presidenti grek Prokopis Pavlopulos ka theksuar se Shqipëria duhet të respektojë minoritin grek në të kundërt Greqia do të vendosë veton për integrimin e Shqipërisë në BE.
Në një fjalim në Kongresin e Këshillit Botëror të Epiriotëve të Diasporës, mbajtur në Prevezë, Pavlopulos ka theksuar se ajo që po ndodh në jug të Shqipërisë është e papranueshme, ku sipas tij, janë prishur pronat e minoritarëve.
“Ato që po shohim kohët e fundit, e themi me të vërtetë me dëshpërim këtë, nuk janë shenja të mira. Ato që po ndodhin, sidomos shembjet e shtëpive, janë totalisht të paligjshme. Prona është e drejtë themelore që mbrohet nga e drejta kombëtare e çdo vendi dhe ajo ndërkombëtare. Kur shohim pra këto fenomene themi se ekziston një shkelje e të drejtave themelore, pra shkelje e shtetit të së drejtës. Nëse Shqipëria dëshiron të bëhet anëtare e BE-së, shembja e ndërtesave që u përkasin minoritarëve grekë nuk favorizon aspak perspektivën evropiane të saj”, ka përfunduar fjalimin presidenti i Greqisë.
Ai ka shtuar se Shqipëria duhet të plotësojë të gjitha kushtet e nevojshme minoritetit grek që ata të jetojnë në një shtet të së drejtës.
“Nuk duhet të harrojmë edhe minoritetin etnik grek, çdo të drejtë e të cilit duhet të respektohet plotësisht në Shqipërinë fqinje, ashtu siç u takon qytetarëve që jetojnë në një shtet të së drejtës. Sepse vetëm vendet që janë me të vërtetë shtete të së drejtës plotësojnë minimumin dhe tashmë kushtin e qartë për integrimin në familjen e madhe të popujve evropianë”, ka deklaruar Pavlopulos.
