Presidenti brazilian Jair Bolsonaro u dërgua në një spital në Sao Paulo për analiza herët të hënën, pasi kishte përjetuar shqetësime në bark, tha qeveria.
Bolsonaro “po shkon mirë” dhe informacione të mëtejshme do të jepen më vonë në një buletin mjekësor, thuhet në një deklaratë të qeverisë të publikuar nga media Globo.
Ai u kthye në kryeqytetin financiar gjatë natës, nga një pushim i Vitit të Ri në bregdet dhe u dërgua menjëherë në Spitalin Vila Nova Star, sipas Globo.
Globo citoi mjekun e Bolsonaros, Antônio Luiz Macedo, të ketë thënë se Bolsonaro kishte dhimbje stomaku.
Globo tha se Macedo ishte me pushime në Bahamas, dhe ishte duke pritur për një fluturim kthimi në Brazil për të parë Bolsonaron, i cili thuhet se nuk kishte asnjë dalje publike të planifikuar të hënën.
Që nga goditja me thikë gjatë zgjedhjeve presidenciale të 2018-ës, Bolsonaro i është nënshtruar disa herë operacionit në stomak.
Burimi i lajmit: abc News. Përshtatur nga Tirana Today
