Një person i armatosur ka vrarë të paktën 8 persona, në një universitet në qytetin rus të Perm, thonë zyrtarët. Sulmuesi shkoi në kampus të hënën në mëngjes, dhe nisi të shtënat.
Studentët dhe mësuesit u mbyllën brenda ndërtesës së universitetit; të tjerët u panë duke u hedhur nga dritaret.
Policia thotë se ata plagosën dhe ndaluan sulmuesin, i cili është student. Më shumë se 20 persona u plagosën gjatë të shtënave.
Incidenti ndodhi në orën 11:00 në Universitetin Shtetëror të Perm, i vendosur rreth 1.300 kilometra (800 milje) në lindje të kryeqytetit, Moskës, në Urals.
Një profesor në universitet tregoi se çfarë bënë studentët: “Ata u hodhën jashtë duke bërtitur”, tha ai për “BBC”.
“Një nga studentët më tha se ishte një e shtënë. Kam dëgjuar të shtëna, të gjithë filluan të shpërndahen në drejtime të ndryshme. Unë shkova te studentët e mi në ndërtesën e dytë dhe vazhdova të dëgjoja të shtënat”.
Studentë të tjerë u mbyllën në klasa, në një përpjekje për t’i shpëtuar sulmuesit. “Kishte rreth 60 persona në klasë. Ne e mbyllëm derën dhe e bllokuam me karrige”, tha një student, Semyon Karyakin, për agjencinë e lajmeve “Reuters”.
Raportohet se personi i armatosur ka vepruar vetëm, dhe tha se nuk kishte motive politike apo fetare. Në një postim në mediat sociale, ai shkruante se ishte konsumuar nga urrejtja dhe kishte për qëllim të bënte dëm për të tjerët.
“Unë kam menduar për këtë për një kohë të gjatë, kanë kaluar vite dhe kuptova se kishte ardhur koha për të bërë atë që ëndërroja”.
Personi i armatosur u identifikua si student në universitet, sipas Komitetit Hetues që merret me hetimet për krime të rënda. Universiteti i Permit postoi një mesazh në rrjetet sociale, duke u bërë thirrje studentëve që ishin në ndërtesë, të qëndrojnë në klasa.
Burimi i lajmit: BBC. Përshtatur nga Tirana Today
