Forca të shumta policie kanë rrethuar Teatrin Kombëtar në orët e para të ditës, ndërsa kanë nisur aksionin për prishjen e tij.
Pavarësisht pranisë së shumtë të qytetarëve të cilët kundërshtojnë, policia e rendit dhe ajo bashkiake duket të vendosura për të zbatuar planin.
Mes artistëve dhe policisë ka pasur dhe përplasje civile, ndërsa regjisori Edmond Budina është tërhequr zvarrë, në mënyrë që të mos futet në ambientet e brendshme të Teatrit.
Në një prononcim për Fax News, Budina tha se i ka memorizuar ata që e kryen këtë akt. “Kriminelët më morën zvarrë, si të isha një leckë. Kjo është një gjë e ndyrë. Ne po mbrojmë kulturën dhe qytetarinë shqiptare, të vijë një polici që s’ka pikën e dinjitetit, nuk e di se çfarë mund të themi.
Sa të jetë jeta nuk do ta harroj, Edi Rama mbaje mend këtë që më ke bërë. Ti dhe këlyshët e tu, asnjëherë nuk të kam sulmuar direkt, po këtë që ndodhi sot nuk mund ta fal.
Nuk e kam bërë as regjisorin dhe as aktorin, i mbështetur te politika, e kemi bërë gjithçka me djersë dhe me gjak”, u shpreh Budina.
