Kronikë

Mashtroi vëllanë e drejtorit të Policisë së Tiranës, ja si i fuste në kurth biznesmenët 64-vjeçarja

               Publikuar në : 08:18 - 24/07/19 M. S

Një 64-vjeçare u arrestua një ditë më parë, pasi akuzohet për mashtrim. Në prangat e uniformave blu të kryeqytetit përfundoi Violeta Petro. Kjo e fundit akuzohet se nëpërmjet mashtrimit, i ka marrë shuma të mëdha biznesmenëve të ndryshëm në Tiranë.

Hetimet ndaj të moshuarës kanë nisur prej disa muajsh, ku ka rezultuar se ajo prezantohej tek biznesmenë të ndryshëm si përfaqësuese e organizatës UNICEF që operon në Shqipëri. Duke përdorur emrin e organizatës, 64-vjeçarja mashtronte duke përvetësuar shuma të konsiderueshme parash nga biznesmenë të ndryshëm, të cilëve u premtonte financime në projekte të mëdha ndërtimi.

Një nga ndërtuesit që ka rënë pre e mashtrimit të 64-vjeçares Violeta Petro, është edhe vëllai i Rebani Jaupit, drejtorit të Policisë së Tiranës. Aktualisht, oficerët e Krimit Ekonomik në Policinë e Tiranës kanë dokumentuar 2 raste mashtrimi, një në shumën prej 60 mijë Dollarësh dhe një tjetër prej 32 mijë Dollarësh.

Pas publikimit të lajmit për arrestimin e Petros, kanë mbërritur edhe denoncime të tjera nga qytetarët, dhe menjëherë kanë nisur verifikimet.

64-vjeçarja më herët ka punuar si edukatore kopshti, ndërsa rezulton e divorcuar dhe nënë e dy fëmijëve. Ajo do të hetohet nga Prokuroria e Tiranës, për veprat penale “Mashtrimi”, “Fshehja e të ardhurave” dhe “Mospagimi i taksave dhe tatimeve”.

Nga hetimet e deritanishme rezulton se rreth 1 milion euro është dëmi që Violeta Petro iu ka shkaktuar biznesmenëve, ku i mashtronte duke u premtuar projekte të mëdha ndërtimi, të financuara nga një organizatë e huaj.

Kthehu
WhatsApp Denonco ne TT