Ish-deputeti i PD, Gent Strazimiri, ka komentuar deklaratën e kryeministrit Rama, që kanabisi të legalizohet në vendin tonë vetëm për receta mjekësore. Në një intervistë për “Fax News”, Strazimiri tha se kanabisi ka qenë legal, dhe me këtë është marrë edhe policia.
Ai më tej jep edhe një deklaratë të fortë, duke thënë se ministra të Brendshëm janë marrë me kultivimin e kanabisit, transportin dhe kanë nxjerrë fitime. Strazimiri kujton rastin e ish-ministrit të Brendshëm, Saimir Tahiri, i cili ishte pjesë e përgjimeve të prokurorisë italiane për bashkëpunime me bandat kriminale për trafikimin e lëndëve narkotike.
Ish-deputeti është shprehur më tej se me këtë pandemi ekonomike që i është shtuar krízës politike, kjo është një shashkë tjetër që kryeministri e hedh për të shpërqëndruar qytetarët.
“Lidhja midis këtij kryeministri e kësaj qeverie dhe ministrave të saj me kanabisin, nuk është aspak gjë e re. Ka 8 vjet që ky vend kanabistan, e cilësojnë të tillë politikanë të rëndësishëm të Europës, e cilësojnë të tillë media jo vetëm në Europë, por edhe në SHBA.
Është një lidhje financiare, aspak ideologjike dhe shpirtërore apo emocionale me kanabisin, është lidhje financiare siç e ka vërtetuar edhe prokuroria italiane përmes përgjimeve, këta financojnë fushatat elektorale.
Në rastin konkret, me këtë pandemi ekonomike që i është shtuar krízës politike, është një shashkë tjetër që kryeministri e hedh që ne të harxhojmë minuta të vlefshme për të parë problemet reale që ka shoqëria, duke hapur një spirale siç është legalizimi i kanabisit.
Praktikisht, sa i përket kanabisit, ka qenë legale se janë marrë policia me organizimin, mbjelljen deri dhe në transportin edhe ministra të Brendshëm janë marrë me kultivimin e kanabisit, transportin dhe kanë nxjerrë fitime. Kjo është me prova.
Rilindja ka arritur të marrë deputetë, për shkak të këtyre influencave, bandave kríminale të heroinës dhe kokainës”, u shpreh Strazimiri.
