Një biznesmen ka ndërruar jetë si pasojë e një infarkti, pasi policia i shoqëroi të birin në Komisariat për shkelje të orarit të caktuar të mbylljes së aktivitetit. Ngjarja është shënuar në orët e para të ditës në Sarandë, ku biznesmeni Shuaip Sejko, 62-vjeç, ka ndërruar jete si pasojë e një infarkti.
Me anë të një deklaratë për mediat, blutë e Sarandës sqarojnë se kanë gjobitur me 1 milion lekë të reja shtetasin me inicialet K.S, pasi nuk ka respektuar orarin e përcaktuar për mbyllje të aktivitetit, në lokalin e tij, në lagjen nr.1 Sarandë.
Policia ka ushtruar kontroll sot rreth orës 04:00 në lokalin e djalit të biznesmenit. Aty ka gjetur një tavolinë, dhe për këtë arsye ka shoqëruar të riun në Komisariat. Kanë qënë dëshmitarët okularë të ngjarjes, të cilët menjëherë kanë njoftuar të atin e tij, biznesmenin Shuaip Sejko.
Ai ka tentuar te niset drejt Komisariatit të Sarandës, por është ndier keq dhe ka përfunduar në spital, ku më pas ka ndërruar jetë si pasojë e një infarkti.
