Forcat e policisë kanë blinduar qytetin e Shkodrës, një ditë pas vrasjes së dyfishtë të dy vëllezërve Astrit dhe Brahim Bilali.
Mësohet se forca të shumta policie qarkullojnë në qytet duke kaluar në sitë çdo rrugë e ngritur postblloqe të shumta për evidentimin e çdo rasti të dyshimtë.
Edhe Asmer Bilali i cili ndodhet në paraburgim në burgun 313 në Tiranë, i ka kërkuar leje Prokurorisë që të marrë pjesë në ceremoninë mortore që mbahet sot në orën 15:00.
Por, burgjet ende nuk kanë një përgjigje zyrtare lidhur me kërkesën e të riut për të marrë pjesë në funeralin e të atit dhe të xhaxhait të tij.
Policia ka shoqëruar deri më tani rreth 30 persona dhe ka sekuestruar pamjet e kamerave të sigurisë, një provë që mund të ndihmojë për zbardhjen e krimit të dyfishtë.
Po ashtu, në pyetje do të merren dhe të afërmit e viktimave në orët e mbrëmjes ose ditën e nesërme pas kryerjes së ceremonisë mortore.
