Konstitucionalisti Shkëlqim Hajdari është shprehur se demokracia shqiptare është hibride, teksa liston edhe problemet me të cilat përballet sot ajo.
I ftuar në emisionin “Repolitix”, Hajdari thekson se problemet me demokracinë shqiptare nisën në vitin 2008, ku sipas tij palët politike vepronin pa asnjë lloj konsulte kushtetuese.
Hajdari deklaroi se faktori ndërkombëtar në atë kohë ishte mjaft pasiv dhe zërat kundërshtues ishin të paktë. Sipas konstitucionalistit, Shqipëria është sot një vend që nuk prodhon demokraci të pastër.
“Në qoftë se në pjesën e parë të qeverisjes pas pluralizmit në Shqipëri, nga pikëpamja e strukturimit kushtetues u bënë hapa të rëndësishëm, përfshirë edhe ligjin zgjedhor që ishte mazhoritar, edhe elementë të tjerë të demokracisë që balanconin pushtetet midis tyre, siguronin votën e qytetarëve jashtë votimeve kolektive. Edhe votën e drejtpërdrejtë e cila më vonë prodhon organet të cilat ndërtojnë shtetin. Në prill të vitit 2008, kryeministri i asaj kohe bashkë me kryetarin e opozitës, për gjithë natën, pa asnjë lloj konsulte kushtetuese, me heshtjen totale të faktorëve ndërkombëtarë në Shqipëri. Pak zëra atëherë i kanë kundërshtuar, që ishin zëra publikë dhe sot ata zëra publikë nuk janë politikë. Siç është për shembull Besnik Mustafai, megjithëse është kthyer tek ai komisioni si fronti demokratik, më duket. Gjithashtu edhe profesor Rexhep Uka, Arben Malaj, presidenti Bamir Topi në atë kohë etj. Për fatin e keq të neve shqiptarëve që gjithmonë shikojmë se si sillet faktori ndërkombëtar me përfaqësuesit e tyre në Shqipëri, ky faktor në 2008 ka qenë pasiv. Benefitet e vitit 2008 po i vuajmë. Sot Shqipëria është një vend që nuk prodhon demokraci të pastër. Kjo është e gjithë beteja e madhe se çfarë do bëjmë me ringritjen e demokracisë”, tha ai.
