Dhjetëra naftëtarë, të cilët marshuan dje nga Fieri në Tiranë, po protestojnë para Ministrisë së Energjisë. Naftëtarët e Fierit dhe Ballshit kërkojnë pagat e tyre të prapambetura dhe sigurimet shoqërore.
Ndërkohë, përfaqësues të sindikatave të naftëtarëve dhe një përfaqësues nga punëtorët po diskutojnë me ministrin Damian Gjiknuri.
“Nuk futem në rryma politike, dua të drejtat e mia dhe dua bukë. Duam rrogat. Më trego vendimet e gjykatës. Është gjithë kjo Mallakastër këtu po vdes për bukë, 13 rroga. Rrogat nuk hidhen, këto nuk hidhen. Zgjodhëm përfaqësuesin, shpresojmë të zgjidhë punë. Pa hedhur rrogat nuk lëvizim. Po vdesim në Mallakastër, të tërë po hanë për Vit të Ri dhe Krishtlindje”, thotë një nga protestuesit.
Një tjetër kërkon jo vetëm marrjen e pagave të prapambetura, por edhe rifillimin e punës në uzinë:
“Kërkojmë jo vetëm të hidhen pagat por të vihet në punë sa më shpejt ajo uzinë. Të gjithë ne që jemi këtu bashkë me familjet dhe fëmijët tanë e kemi lidhur jetën me atë naftë. Kërkojmë ndërhyrjen e qeverisë të zbatojë ligjin dhe tu japë zgjidhje këtyre punëtorëve që erdhën në këmbë nga Fieri deri këtu. Nuk kemi çfarë humbasim, do të ikim vetëm kur të marrim lekët. Kemi pa marrë dy paga të këtij viti, nëntori dhe dhjetori dhe kemi 13 paga të vitit 2015-2016. Ndërrimin e kompanive e bëjnë qeveritë që vinë, nuk kemi punë ne. Kërkojmë zbatimin e ligjit”.