“Po u shet sapunin për djathë”, Basha shton dyshimet për të infektuarit

Kryetari i Partisë Demokratike, Lulzim Basha, ka dyshime lidhur me numrin zyrtar të të infektuave në Shqipëri. Qëndrimin e tij e bëri publik mbrëmjen e sotme në emisionin “Opinion”, ku tha se shifrat përpilohen sipas një protokolli që mbahet sekret. Ai shigjeton qeverinë, për numrin e ulët të testimeve. Për rrjedhojë, pritet edhe një numër i ulët i infektimeve.

“Nëse qeveria do të kishte pasur një plan dhe të kishte patur transparencë, Shqipëria sot do të ishte më e hapur dhe nuk do të kishim këtë gjendje ku pandemisë së COVID-19 i bën konkurencë pandemia po aq e rrezikshme, ajo ekonomike.

Problemi është kur ke shifra zyrtare të cilat nuk janë transparente, por përpilohen sipas një protokolli që mbahet sekret. Ku numri i testimeve e ke më të ulët, atëherë ke dhe numrin e ulët të infektimeve dhe u shet shqiptarëve sapunin për djathë.

Në raport me vendet e tjera të Europës, raporti është 1 me 10, 1 me 100 i testimeve në Shqipëri, në raport me vendet e tjera të rajonit janë 1 me 3, 1 me 4 dhe në rastin më të mirë 1 me 2.

Pra qeveria e ka mbajtur të ulët numrin e testimeve, dhe shifrat që na tregon nuk janë shifrat e realitetit. Këtë mund ta shikoni fare thjesht, para pak ditësh kurba nisi aq lartë sa më 4 prill. Kurbës së Shqipërisë nuk i përafrohet asnjë vend tjetër, pasi janë mbajtur testime të ulëta. Gjurmimi i personave nuk është bërë. Është akoma më e vështirë kur nuk ke kite testuese”.