Banorët e fshatit Derven të Krujës kanë telefonuar për ndihmë policinë, pasi kanë dëgjuar të shtëna me armë zjarri.
Për pasojë, uniformat blu kanë ndërhyrë në kohë duke vënë në pranga një 47-vjeçar që po qëllonte në ajër me armë zjarri.
“Në numrin 112 të Komisariatit të Policisë Krujë kanë ardhur telefonata nga banorët e fshatit Derven se një shtetas po qëllonte me armë zjarri në ajër. Menjëherë shërbimet e Policisë Krujë janë nisur në drejtim të adresës së dhënë, ku shtetasi që qëllonte me armë zjarri në ajër u largua sapo pa forcat e Policisë.
Pas krehjes së zonës dhe bashkëpunimit me banorët, Policia lokalizoi, kapi dhe arrestoi në flagrancë shtetasin: A. S., 47 vjeç, banues në fshatin Derven, Krujë”, thuhet në njoftimin e policisë.
Po ashtu, uniformat blu gjetën dhe sekuestruan në cilësinë e provës materiale armën e zjarrit kallashnikov dhe disa fishekë luftarakë.
