Seanca e sotme e Kuvendit filloi me një orë vonesë, për shkak të mbledhjes së grupit parlamentar të PS-së. Nga kjo vonesë, deputeti Halit Valteri ka reaguar mjaft i revoltuar, ndërsa hodhi edhe një akuzë të rëndë. Ai tha se janë mbledhur në Parlamentin e Shqipërisë dhe jo tek selia e PS-së.
Por Valteri nuk e la me kaq. Ai lëshoi shashkën e radhës ndaj socialistëve, ku sipas tij u bënë shkak për nisjen e seancës me vonesë, pasi u mblodhën për të shqyrtuar propozimin e Presidentit Ilir Meta, për në krye të Kontrollit të Lartë të Shtetit.
“Ky është Parlamenti i Shqipërisë dhe jo selia e PS-së. Seanca ka filluar në 11:00, ndërkohë që duhet të niste në 10:00. Nëse këta nuk kanë kohë të mblidhen 2 orë para për pazarin që po bëni me Metën, për t’i dhënë KLSH-në, nuk është faji ynë apo i shqiptarëve. Ju për një minutë i hiqni fjalën deputeteve, dhe një orë dhunohet Kuvendi se ka mbledhje PS-ja. Në emër të grupit ju kërkojmë të mos përsëriten më këto situata”.
Në përgjigje të kësaj vërejtje, ka reaguar kreu i Kuvendit, Gramoz Ruci, duke thënë se një gjë e tillë nuk do të përsëritet më.
“Nuk do përsëritet më, e thashë edhe në nisje të seancës. Eshtë e drejtë ekskluzive e cdo grupi parlamentar të kërkojë ndërprerje e seancës deri në nje orë, por nuk ishte ky rasti, nuk do përsëritet më”, tha ai.
