Gjatë seancës së sotme plenare, deputetja Rudina Hajdari tha se të rinjtë dolën në protesta për ditë me radhë, për shkak të pasigurisë që i ka krijuar shteti. Hajdari u shpreh se të rinjtë kanë ëndërr që të bëhen trafikantë, pasi në këtë mënyrë dalin nga varfëria.
Teksa sulmoi klasën politike, ajo u rikujtoi se të rinjtë nuk kanë mundësi për tu punësuar. S’kanë mundësi për tu shkolluar, e për të blerë libra. Mjaft e revoltuar, deputetja Hajdari shprehu shqetësimin se të rinjtë nuk kanë perspektivë përpara.
“Këto kohë kam folur me të rinjtë shqiptarë, se doja të dija se çfarë i shtyu të dilnin në shesh. Pasiguria e tyre, pambrojtja është një frikë, frikë të pranosh se shteti shqiptar nuk është në mbrojtje të të rinjve. Të rinjtë që dolën në sheshe ishin të revoltuar, politika bëri atë që bën gjithmonë, i quan të rinjtë halabakë, rrugeçër, halabakë. Janë këta që kërkojnë votat dhe kërkojnë për të vjedhur. Si mos të revoltohet një i ri sot kur ëndërron që të bëhet një trafikant droge, që të dalë nga varfëria, si mos të revoltohet kur nuk ka mundësi për tu punësuar. Kur prindërit e tyre nuk i shkollojnë dot, nuk i çojnë dot në shkolla, nuk i blejnë libra. Si mos të revoltohet një i ri kur nuk ka perspektivë përpara, kur këtu mbizotëron paraja, njohja. Ju jetoni në kodrina, në vende të shtrenjta, bëni hare sa herë të doni, nuk respektoni ligjin. Ndërkohë që të rinjtë shqiptarë nuk e kanë këtë shans, ju i thyeni kockat. Nga arroganca juaj, që nuk pranoni dot revoltën e tyre . Ata do vazhdojnë të dalin dhe pse ju i fusni nëpër burgje, sepse ka ardhur momenti kur nuk mban më. Politikanët janë shndërruar në më të urryerit në vend, ju sot i keni hequr dinjitetin të rinjve shqiptarë, duke i kthyer në emigrantë. A ka gjë më të keqe se kjo, që ti ktheni në trafikantë droge që të ecin përpara. Unë jam e sigurtë që drejtësia për ta do vijë”, u shpreh Hajdari.
