Ka përfunduar mbledhja e radhës e Këshillit Politik për Reformën Zgjedhore.
Në një prononcim për mediat, bashkëkryetari i tryezës së Reformës Zgjedhore, Damian Gjiknuri, tha se është gjetur dakordësi për kërkesat e opozitës. Ai shtoi se puna për amendimet e Kodit Zgjedhor ka përfunduar.
“Plotësuam kërkesat e opozitës, për ato garanci që kanë ekzistuar te ligji aktual, pavarësisht se disa nga standardet e ODHIR kërkonin ndryshime. Për ne është më e rëndësishme që ligji zgjedhor të reflektojë shqetësimet, frikërat apo edhe të kaluarën e afërt të opozitës në mënyrë që të hyjmë në zgjedhje me një ligj të gjithë pranuar.
Mbrojtja e të dhënave vlen njësoj si për shtetasit që jetojnë këtu edhe për ata jashtë vendit. Duke bërë një regjistër me integritet ne kemi mundësi të kemi integritet të kësaj vote. Më pas procedurat mund t’i bëjë shumë mirë KQZ. Marrëveshjen e kemi arritur dhe të gjitha këto kanë vlerë për zgjedhjet e ardhshme”, tha ai.
