Ish-kreu i UEFA, Michel Platini ka hapur ‘luftë’ ndaj Presidentit të FIFA, Gianni Infantino.
Në një intervistë për revistën zvicerane ‘L’Illustre’, Platini kërkoi dorëheqjen e kreut të qeverisë së futbollit botëror, teksa thekson se postin ai e fitoi pas rrethanave të krijuara.
“Infantino dhe Lauber mendojnë se janë të paprekshëm dhe mbi ligjin”, theksonte në intervistën e tij Platini, i cili u la jashtë gare për postin e presidentit të FIFA pas dënimit të tij me pezullim nga të gjitha aktivitetet për shkak të një page prej 2 milionë Frangash Zvicerane të përfituara nga ish presidenti i FIFA, Sepp Blatter.
Së fundmi është zbuluar se Infantino dhe Lauber kanë zhvilluar një sërë takimesh informale mes tyre, duke ngritur dyshimet për një lloj pakti mes FIFA-s dhe sistemit të drejtësisë.
“Besoj se Lauber është i ndërgjegjshëm që e ka kaluar vijën e kuqe. për mendimin tim, Infantino duhet të dorëzojë mandatin e tij. Problemi është se ai u bë president i FIFA falë rrethanave të krijuara, si një oportunist, pa asnjë ligjshmëri të veçantë, kështu që do të bëjë ç’është e mundur për të mbajtur këtë post”, tha Platini.
