Kërkesa e Lëvizjes Socialiste për Integrim, për anulimin e votimit të ligjit për Teatrin, është rrëzuar nga Kuvendi.
Projektligji i propozuar nga qeveria, u miratua me 75 vota nga ana e mazhorancës, të enjten në mbrëmje, pas një seance maratonë.
Të nesërmen LSI-ja kërkoi anulimin e këtij votimi, pasi sistemi elektronik tregoi se në proces kishte marrë pjesë edhe deputeti Vangjel Tavo, që nuk ishte prezent në sallën e Kuvendit atë ditë.
Gjithsesi pas këqyrjes së kamerave të sigurisë së Kuvendit, u pa që deputetët e LSI-së Endrit Braimllari dhe Edmond Panariti kishin ndërruar kartonët, për të shkaktuar këtë ngatërresë.
Lidhur me këtë situatat ka reaguar vetë Edmond Panariti ku shkruan se: “Nuk arrij ta besoj!! Nje spekulim dhe mashtrim mjeran permendja e emrit tim si deformues i procesit te votimit. Ftoj kolegun deputet Robert Bitri, ne emer te integritetit te tij te deshmoje se ai e ka perdorur karten e tij te deputetit ne momentin e uljes ne vendin e tij dhe kjo eshte lehtesisht e provueshme… Kaq”.
Ndërsa kreu i grupit parlamentar të LSI-së, Petrit Vasili vijon me një reagim të tij ku shkruan:
“Epidemi hajduterie votash ne parlament.Hajdutet e votave refuzojne e pengojne rivotimin e ligjit per teatrin dhe vulosin manipulimin mu ne mes te parlamentit te votimit te ligjit per teatrin.
Vodhen teatrin,vjedhin votat edhe ne parlament,vjedhin shqiptaret perdite me koncesione.
Me nje fjale eshte epidemi hajdutesh ne syte e shqiptareve dhe ne krye te qeverise.
Dihet fundi i hajduteve…”.
Ndërsa deputetja Kejdi Mehmetaj, ka sulmuar ish-deputetin e LSI-së Robert Bitri.
“Rilindasi i vonuar, alias Robert Bitri …
Nuk kishte se si të mos bëhej sërish protagonist i shëmtisë së maxhorancës në përpjekjen për të prishur teatrin, edhe rilindasi më i ri i rilindjes së vjetër të Edi Ramës, përkatësisht Robert Bitri!
Sepse, megjithëse i ka sytë në ballë, e megjithëse nuk ka shfaqur simptoma çorientimi, nuk na ka dhënë ndonjë shenjë se nuk di as shkrim e as këndim, aq sa për të mos lexuar emrin e tij në kartën e vet apo edhe në monitorin e sallës së Kuvendit!
Mungesë integriteti, karakter të dyfishtë, moral të denjë për një rilindas shëtitës!
Ky është portreti i Robert Bitrit, rilindasit më të ri të rilindjes së vjetër të Edi Ramës, i cili nuk ka se përse të qëndrojë më as formalisht në rradhë me deputetët e LSI-së!”.
