Raketat e lëshuara nga Izraeli drejt periferive të kryeqytetit, Damaskut, janë kapur nga mbrojtja ajrore e Sirisë, njoftoi media shtetërore. Sipas një deklarate ushtarake të mbrojtjes ajrore siriane, raketat shënjestruan vende rreth Damaskut dhe shkatërruan disa prej tyre, tha media shtetërore SANA.
“Armiku izraelit qëlloi një breshëri raketash nga Palestina veriore e pushtuar, duke synuar pozicionet pranë Damaskut”, tha SANA, duke cituar një zyrtar ushtarak të paidentifikuar.
“Mbrojtja jonë kundërajrore u aktivizua, dhe mundi të godiste disa nga raketat e armikut”.
Një zëdhënës i ushtrisë izraelite tha: “Ne nuk komentojmë raportet në mediat e huaja”.
Monitoruesi i luftës sirian për të drejtat e njeriut tha se bastisja e së shtunës shkatërroi depo armësh dhe municionesh, që u përkisnin forcave iraniane dhe milicive aleate në Qudssaya dhe Dimas.
Izraeli i ka sulmuar këto pozicione në të kaluarën. Më 14 tetor, një sulm ajror izraelit në pozicionet iraniane në Sirinë qendrore vrau nëntë luftëtarë, aleatë të qeverisë siriane.
Sulmet erdhën disa ditë pasi Siria akuzoi Izraelin për kryerjen e një sulmi në jug të vendit. Izraeli, i alarmuar nga ndikimi rajonal në rritje i Iranit dhe prania ushtarake në Siri, ka nisur qindra sulme në Siri gjatë viteve, por rrallë i pranon ose diskuton operacione të tilla.
Sulmet në Siri zakonisht ndodhin gjatë natës. Izraeli e ka pranuar se po synon bazat, autokolonat e armëve dhe objektet e lidhura me milicitë aleate të Iranit, si grupi i fuqishëm libanez Hezbollah. Ai synon gjithashtu dërgesat e armëve që besohet të jenë të destinuara për grupin.
Hezbollahu po lufton në anën e forcave të presidentit sirian Bashar al-Assad në luftën civile.
Burimi i lajmit: aljazeera. Përshtatur nga Tirana Today
