Kryetari i Lidhjes Demokratike të Kosovës, Isa Mustafa, do të japë dorëheqjen nga posti, pas rezultatit të partisë së tij në zgjedhjet parlamentare të 14 shkurtit.
Në një konferencë për media në Prishtinë, Mustafa u shpreh se së shpejti, Kuvendi i LDK-së do të zgjedhë kryetarin e ri.
“Rezultati është shumë i keq për LDK-në. Është një rezultat që nuk e kemi pritur fare Vota e qytetarëve është ajo që respekohet dhe në shenjë të respektimit të kësaj vote dhe të hapjes së rrugëve të mëtejshme për riorganizim të LDK-së, unë sot e kam njoftuar kryesinë se do ta thërrras Kuvendin e LDK-së për zgjedhjen e kryetarit të ri të LDK-së, në një përiudhë shumë të shpejtë kohore”, tha Mustafa.
Sipas rezultateve të Komisionit Qendror të Zgjedhjeve, LDK-ja ka dalë partia e tretë në zgjedhjet parlamentare të së dielës.
Ajo ka fituar rreth 13% të votave dhe ndodhet shumë larg partisë së parë, Lëvizjes Vetëvendosje, e cila ka siguruar rreth 47%.
Në vendin e dytë ka dalë Partia Demokratike e Kosovës, me rreth 17%.
