Zëvendës kryetari i Bashkisë së Elbasanit, Ervin Saraçi, ka ndërruar jetë në moshën 37-vjeçare, ndërsa nuk ia doli dot mbanë pasi pësoi një goditje cerebrale.
Ervin Saraçi po luftonte me jetën, e ndërsa dy ditë më parë u njoftua se ai ndodhej në koma në gjendje të rëndë.
Zyrtari i lartë, pësoi goditjen teksa ishte ne palestër. Më tej ishte nisur me urgjencë në spital në kryeqytet, dhe iu nënshtrua një operacioni të gjatë.
Një mesazh prekës është përcjellë nga Drejtuesi i fondacionit “Fundjavë Ndryshe”, Arbër Hajdari. Ai njofton se miku i tij është shuar në moshën 37-vjeçare. Në këtë dedikim, Arbri shprehet se do të kujtojë buzëqeshjen dhe fisnikërinë e tij.
“Sot ndërroj jetë në moshën 37 vjeçare miku im Ervin Saraçi. Do të kujtoj gjithmonë buzëqeshjen dhe fisnikërinë tënde mik i dashur. Qofsh i parajsës!”, shkruan Arbër Hajdari.
Ervin Saraçi ka mbaruar studimet e larta për gjuhën frënge në Elbasan, dhe ka kryer Masterin ‘Shkencat Politike’ në Belgjikë. Në vitin 2006-2007 punoi si mësues i gjuhës frënge në Shkollën e Mesme të Përgjithshme në Peqin. Në shtator të vitit 2011-2013, iu besua drejtimi i kabinetit të Kryetarit të Bashkisë Elbasan.
Në vitin 2013-2015 u emërua drejtor i Drejtorisë së Kujdesit Social po në Bashkinë Elbasan, e më pas u rrit në detyrë, duke zënë postin e nënkryetarit të Bashkisë.
