Protestuesit kanë dalë sërish në rrugë në ditën e pestë sot, pas vrasjes së 25-vjeçarit Klodian Rasha nga policia.
Protestuesit u grumbulluan fillimisht në sheshin “Skënderbej”, dhe më pas kaluan përpara Ministrisë së Brendshme. Në shenjë simbolike, disa prej protestuesve u shtrinë përtokë përpara hyrjes kryesore të Ministrisë së Brendshme.
Prej andej, turma e protestuesve u drejtua për në bulevardin “Dëshmorët e Kombit” përpara godinës së Kryeministrisë.
Me parrulla në duar, protestuesit kërkojnë dorëheqjen e Drejtorit të Përgjithshëm të Policisë së Shtetit, Ardi Veliu.
Protesta e cila është në ditën e pestë të saj është përshkallëzuar. Policia ka hedhur gaz lotsjellës dhe ujë me presion ndaj turmës së protestuesve.
