Shkodra është kthyer në një vatër infeksioni, e për këtë çështje mjeku i njohur Pëllumb Pipero jep sqarimet. Gjatë një interviste në emisionin ‘Open’, Pipero tha se në Shkodër qytetarët nuk kanë respektuar masat. E për këtë arsye ka shumë raste me të konfirmuar me koronavirus.
Doktor Pëllumb Pipero shprehu shqetësimin që qytetarët nuk respektojnë rregullat e vendosura nga shteti, për mos përhapjen e COVID-19. Madje ai shtoi se shkodranët kanë përfunduar në këtë situatë të rëndë, pasi kanë frekuentuar lokalet, dhe kanë shkuar në ceremoni mortore.
“Shkodrën do ta konsideroja si një rast të veçantë. Unë mendoj që në tërë këtë menaxhim, dy janë indikatorë të rëndësishëm që tregojnë ecurinë e saj. Së pari, gjurmimi i rasteve pozitive, dhe së dyti është respektimi i masave të qeverisë. Mesa duket, njëra nga këto hallka, në mos të dyja kanë çaluar. Unë kam informacion se gjurmimi ka vazhduar me intensitet në Shkodër. Ndërkohë kam informacion se qytetarët nuk kanë respektuar masat. Kanë marrë pjesë në varrime, kanë frekuentuar lokalet. Është situatë që duhet të analizohet nga epidemiologët”.
