Një situatë kaotike ka qenë sot në selinë e PD-së, ku grupi i Berishës është hasur për herë të dytë në këtë vit me dyert e mbyllura. Dje grupi i Berishës shkoi në selinë blu, por dera e hyrjes kryesore dhe dy anësoret ishin të mbyllura. Me të njëjtën situatë janë hasur edhe grupi i sotëm që drejtohej nga Aldo Bumçi, Gent Strazimiri dhe Ivi Kaso.
Kryedemokrati Lulzim Basha ftoi sot gazetarët për një kafe mëngjesi, në oborrin e selisë së PD-së. Koha e kafesë ka përkuar me orën kur mbështetës së grupit të ish-kryeministrit Berisha si edhe të rinj të FRPD-së shkuan në selinë blu.
Pasi kanë trokitur në derën qëndrore, ata kanë mbajtur deklarata për mediat në shkallët e selisë e më pas janë larguar, ndërsa kryedemokrati Basha ka hyrë në seli pas kafes me gazetarët.
Basha ka hyrë nga dera e pasme e godinës, përsa kohë hyrja qëndrore po i nënshtrohet një rikonstruksioni, sikundër u shpreh edhe sekretari i përgjithshëm i PD-së, Gazment Bardhi.
Përplasjet vijnë në një kohë kur mbështetësit e Berishës, kanë thirrur një protestë në datën 8 janar, ditë në të cilën siç shprehen, demokratët do të marrin në kontroll shtëpinë e tyre. 5 janari shënonte afatin të cilin mbështetësit e Berishës i kishin lënë kryetarit Lulzim Basha, për të liruar selinë e Partisë Demokratike.
