Një punonjës policie është vënë në pranga, pas aksidentit me vdekje të ndodhur në Kamëz. Punonjësi i policisë, së bashku me vëllanë janë arrestuar për shkak se me makinën tip “Benz” me të cilën po udhëtonin mbrëmë pak pas mesnate, aksidentuan motorin tip “Suzuki” me drejtues një 26-vjeçar, i cili humbi jetën menjëherë si pasojë e përplasjes.
Arrestimi i inspektorit me inicialet R.M. 20 vjeç, punonjës policie pranë Komisariatit të Policisë Nr.4 Tiranë që ishte duke drejtuar “Benz”-in dhe vëllait të tij M.M., 22 vjeç, është bërë nga Shërbimi për Çështjet e Brendshme dhe Ankesave.
Njoftimi i SHÇBA:
Drejtoria Rajonale e SHÇBA Tiranë arrestuan në flagrancë punonjësin e policisë, Inspektor R.M., 20 vjeç, punonjës policie pranë Komisariatit të Policisë Nr.4 Tiranë, dhe vëllain e tij shtetasin M.M., 22 vjeç.
Arrestimi u krye pasi duke qarkulluar me mjetin tip “Benz” në rrugën “Teuta”, në drejtim të rrethrrotullimit të Frutikulturës, Kamëz, sot rreth orës 00:15 aksidentuan mjetin motoçikletë tip “Suzuki”, me drejtues një 26-vjeçar, i cili ka humbur jetën menjëherë si pasojë e përplasjes. Materialet hetimore janë referuar në Prokurorinë Pranë Gjykatës Shkallës Parë Tiranë për veprën penale “Shkelja e rregullave të qarkullimit rrugor” dhe “Pengimi për zbulimin e të vërtetës”.
