Një aksident me pasojë vdekjen ka ndodhur mbrëmjen e kaluar, te mbikalimi i Shkozetit në Durrës.
Aksidenti ndodhi rreth orës 23:30, në lagjen numër 14, ndërsa viktima është 55 vjeç. Identiteti i tij nuk dihet ende, pasi nuk janë gjetur ende dokumente identifikimi.
Dyshohet se aksidenti ka ndodhur teksa 55-vjeçari po kalonte rrugën, kur është përplasur për vdekje nga një mjet që ka ikur me shpejtësi nga vendngjarja.
Trupi është dërguar në morgun e spitalit, ndërsa policia ka nisur hetimet për zbardhjen e plotë të shkaqeve dhe motiveve të aksidentit.
Informacioni paraprak
Durrës.
Më datë 11.01.2018, rreth orës 23:30, në segmentin rrugor Shkozet- Plepa, në Mbikalimin e Shkozetit një automjet ka aksidentuar një shtetas këmbësor, i cili ka ndërruar jetë, i paidentifikuar.
Shtetasi i aksidentuar është i seksit mashkull, rreth 55 vjeç dhe rreth 1.70 cm i gjatë.
Flokët i ka të prera shkurt dhe të thinjura.
Ka të veshur një xhup ngjyrë të zezë, poshtë xhupit një pulovër ngjyrë blu dhe një këmishë ngjyrë blu me vija të zeza, pantallona ngjyrë të zezë dhe një palë atlete ngjyrë të zezë me taban ngjyrë të bardhë.
Mjeti është larguar nga vendi i aksidentit.
Po punohet për identifikimin e viktimës, gjetjen e mjetit dhe identifikimin e autorit të ngjarjes së mësipërme.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale ” Shkelja e rregullave të qarkullimit rrugor” dhe” Largimi nga vendi i aksidentit” parashikuar në nenet 290/3 dhe 273 të Kodit Penal.
