E martë, 27 Korrik, 2021
32.5 C
Tirana

Përpjekjet amerikane për të frenuar përhapjen e koronavirusit në botë

Në SHBA, ligjvënësit po punojnë për një marrëveshje dypartiake që do të siguronte miliarda dollarë fonde emergjence për të frenuar përhapjen e koronavirusit në botë.

Demokratët e Kongresit kanë kritikuar administratën Trump për një përgjigje të koordinuar dobët, duke e cilësuar të pamjaftueshëm propozimin e Shtëpisë së Bardhë për vetëm 2.5 miliardë dollarë fonde.

Por siç njofton Katherine Gypson e Zërit të Amerikës, zyrtarët shëndetësorë i siguruan ligjvënësit se përpjekjet e SHBA po japin rezultat.

Në Kaliforni, shfaqja e rastit të parë me koronavirus në vend pa asnjë lidhje me burime të jashtme e ka rritur trysninë ndaj ligjvënësve amerikanë për të marrë masa.

Pas një jave mesazhesh kontradiktore të administratës Trump, Zëvendës Presidenti Pence mori drejtimin e përpjekjeve për t’iu përgjigjur kërcënimit.

“Ne do të përdorim të gjithë forcën e qeverisë për t’u përballur me këtë. Presidenti dëshiron ta bëjë të qartë se çfarë përparësie është kjo për të dhe për administratën tonë”, tha zoti Pence.

Por kostot e paparashikuara për koronavirusin do të kërkojnë para shtesë nga Kongresi, duke bërë që demokratët të dilnin pa humbur kohë për të thënë se vetë zoti Trump është përpjekur të shkurtojë programet që do të ishin të nevojshme në këtë rast.

“Kush shkurtoi 35 milion dollarë nga fondi i reagimit të shpejtë për sëmundjet infektive? Presidenti Trump. Kush shkurtoi 85 milion dollarë nga fondi i emergjencës për sëmundjet infektive? Presidenti Trump. Kush shkurtoi 120 milion dollarë nga programet për gatishmërinë dhe reagimin në çështjet e shëndetit publik? Presidenti Trump. Dhe kush thjesht propozoi shkurtimin me 16% të buxhetit të Qendrave për Kontrollin e Sëmundjeve që është agjensia për luftimin e këtyre lloj viruseve? Jo demokratët. Jo media. E bëri Presidenti Trump”, tha senatori demokrat Chuck Schumer.

Presidenti Trump kandidon këtë vjeshtë për rizgjedhje dhe republikanët i akuzojnë demokratët se po luajnë politikë me një krizë ndërkombëtare.

Lexo edhe :   Njerëzimi duhet të përgatitet për shpërthimin e trazirave në mbarë botën

“Koronavirusi nuk do t’ia dijë për ciklet e grindjeve partiake apo lajmet politike. Kjo sëmundje e re nuk mund të presë derisa ligjvënësit të shfryjnë dufin, gjë që mund të na çonte më larg e jo më afër rezultatit.”

Kryetarja e Dhomës së Përfaqësuesve, Nancy Pelosi, e cila është përpjekur të qetësojë njerëzit duke vizituar një qendër të komunitetit kinez në distriktin e saj, tha se ligjvënësit janë afër një marrëveshjeje:

“Ne duhet të jemi të gatshëm për të punuar në një mënyrë dypartiake në Kongres si dhe me administratën, për të arritur qëllimin e duhur. Në lojë është jeta e njerëzve. Nuk është koha për të vënë gishtin te dikush ose për të luajtur politikë,” tha zonja Pelosi.

Lexo edhe :   Njerëzimi duhet të përgatitet për shpërthimin e trazirave në mbarë botën

Zyrtarët e shëndetësisë që informuan ligjvënësit mbi masat e SHBA, thanë se publiku nuk duhet të frikësohet, edhe pse priten më shumë raste.

“Rreziku për publikun amerikan është i ulët. Ne kemi një strategji agresive të frenimit që ka funksionuar realisht deri më tani në 15 raste në Shtetet e Bashkuara. Deri në rastin e sapo shfaqur në Sacramento, nuk kemi patur asnjë rast të ri gjatë dy javëve. Besoj se do të shohim raste të reja,” thotë Dr. Robert Redfield, i Qendrës për Kontrollin e Sëmundjeve.

Lëvizja e shpejtë e virusit po detyron shumë ligjvënës të pranojnë se askush nuk e di se sa para do të duhen, 2,5 miliardë dollarë siç propozon presidenti, apo 8,5 miliardë që është propozuar nga demokratët e Senatit.

“Ne thjesht duhet të garantojmë se shkencëtarët tanë dhe njerëzit në vijën e parë, veçanërisht ata që janë në sistemet e shëndetit publik dhe në spitalet e vijës së parë do të kenë burimet dhe mbështetjen e duhur”, thotë Ami Bera, ligjvënës demokrat.
Megjithë mosmarrëveshjet politike, ligjvënësit shpresojnë ta miratojnë fondin shtesë deri nga mesi i marsit. /Voa

- Reklama -

Më shumë nga kategoria




Të fundit

Raporti i OSBE për zgjedhjet e 25 prillit, reagon delegacioni i BE në Shqipëri

Delegacioni i Bashkimit Europian në Shqipëri, ka reaguar pas publikimit të raportit final nga ana e OSBE-ODIHR, për zgjedhjet parlamentare të 25 prillit. Sipas...

BE: 70% e qytetarëve të vaksinuar me së paku një dozë

Presidentja e Komisionit Evropian, Ursula von der Leyen, tha se 70 për qind e qytetarëve të rritur të BE-së kanë marrë së paku një...

Emri/ Kush është personi i dyshuar për trafik droge, që i shpëtoi policisë

Zbardhet emri i personit i cili arriti që t'i shpëtonte operacionit të policisë ditën e sotme, në zonën e ''Varrit të Bamit'' në kryeqytet,...

Koronavirusi/ Brataj: Delta ka edhe 3 variante të tjera

Kreu i Urgjencës Kombëtare, Skënder Brataj deklaroi se varianti indian i koronavirusit, Delta pritet që të mbizotërojë të gjithë botën, dhe se ky mutacion,...

Covid/ Mbi 3,600 testime në 24 orët e fundit, numri i rasteve aktive në rritje

Situata epidemiologjike në vendin tonë mbetet e qëndrueshme. Ministria e Shëndetësisë bën me dije se në 24 orët e fundit, janë regjistruar 31 raste...