Një përfaqësi e Lëvizjes Studentore Shqiptare ’90-’91, përkujtoi ditën e vrasjes së Azem Hajdarit. Azemi ishte Lider i Dhjetorit ‘90 që solli ndryshimet e mëdha demokratike në Shqipëri dhe heroi i saj. Në homazhe morën pjesë bashkëkohës, ish-studentë të vitit 1990 dhe miq të ndryshëm.
Lëvizja Studentore Shqiptare përkujtoi Azem Hajdarin, liderin kryesor të Dhjetorit ‘90 duke bërë homazhe te varri i tij tek Varrezat “Dëshmorët e Kombit”.
Albina Deda, Ilir Dizdari dhe Spiro Cura dhanë vlerësimin e tyre për Azemin dhe veprën e tij.
Ilir Dizdari, kryetar i Lëvizjes Dhjetor ‘1990, në emër të ish studentëve të demokracisë, bënë homazhe dhe vendosën një kurorë për nder të heroit të demokracisë, Azem Hajdarit.
“Lëvizja Studentore Shqiptare ‘90-’91, erdhi të nderojë figurën e Azem Hajdarit, liderit të studentëve të dhjetorit ‘90.
Sot është një ditë që nuk mund ta harojmë! Ne nuk mund të harojmë historinë tonë, historinë e Shqipërisë. Dhe për këtë arsye erdhëm sot me gjithë simbolikat që mbart kjo ditë, ku Shqipëria e demokracia humbi njeriun i cili ishte iniciatori dhe lideri i parë i Lëvizjes Demokratike në Shqipëri”, u shpreh Ilir Dizdari.
Më herët, me një mesazh prekës, deputetja e Kuvendit të Shqipërisë, Rudina Hajdari, kujtoi të atin, Azem Hajdarin, në 22 vjetorin e vdekjes se tij.
Azem Hajdari ishte një nga themeluesit e Partisë Demokratike, partia e parë opozitare në vend pas periudhës së diktaturës. Ai ishte një figurë kombëtare, teksa luftoi për të drejtën, për një shoqëri pluraliste, ku askush nuk do të mbetej i pakënaqur. Ëndrra e tij ka qenë për një Shqipëri demokratike!
TIRANA TODAY
