Gjatë protestës së 21 janarit të 2011 u vranë Aleks Nika, Ziver Veizi, Hekuran Deda dhe Faik Myrtaj. Shpresa e fundit e familjarëve mbeten organet e reja që do të luftojnë krimin dhe korrupsionin në nivelet e larta. 9 vite pas 21 janarit kur Bulevardi Dëshmorët e Kombit u përgjak me 4 viktima, Kreu i Shtetit, Ilir Meta, thotë se qytetarët u keqpërdorën nga politika. Në një intervistë për “Abc News”, presidenti Meta shprehet se ajo datë na sjell në kujtesë se politika ka përdorur dhunën, kjo për të arritur objektivat në mënyrë të pandershme.
“Ai 21 janar na kujton se politika ka përdorur dhunën për të arritur objektivat politike në mënyrë të pandershme. Kjo na tregon se sa e rëndë është situata kur instrumentalizohen qytetarët për qëllime të tilla. Na kujton se duhet të heqim dorë nga dhuna, për të arritur qëllime politike”, deklaroi Meta.
Në këtë 21 janar nuk ishte i pranishëm kryeministri Edi Rama, pasi ndodhet në Ukrainë, në një vizitë në krye të Presidencës së OSBE-së. Ceremonia përkujtimore për katër të vrarët në Bulevard zgjati vetëm pak minuta. Pas vendosjes së luleve, familjarët dhe socialistët u larguan.
