Rama njoftoi blindimin e dy qyteteve kryesore në vend, Tiranës dhe Durrësit, edhe pas të dielës. Kryeministri njofton se “sipas të gjitha gjasave, perimetri Tiranë-Durrës do të mbyllet prapë”.
Kjo është masa më e re drastike e marrë nga qeveria, pas një sërë vendimesh që u morën dje, për t’a kthyer Shqipërinë në një shtet-rrethim gjatë përballjes me COVID-19. Bilanci i të infektuarve me koronavirus në Shqipëri ka shkuar në 33.
Një prej të prekurve, ndërroi jetë në Spitalin e Durrësit dhe vatra e të infektuarve është zgjeruar në Tiranë, Rrogozhinë, Elbasan, Durrës, dhe Lushnje.
Shumë qytete janë në ‘shtet-rrethim’, dhe është ndaluar dhe lëvizja e makinave private. E vetmja këshillë e përbashkët e institucioneve dhe mjekëve është që qytetarët të qëndrojnë në shtëpi, dhe të kenë sa më pak kontakte me të tjerët.
Po kështu, duke nisur nga dita e nesërme, Shqipëria do të bllokojë hyrje-daljet edhe në pikat e kalimit kufitar me Greqinë.
Lajmin e bëri të ditur kryeministri Edi Rama në një postim në Facebook, sipas të cilit transporti ajror dhe tokësor me autobus, do të mbyllen me shtetin grek nga e shtuna në orën 10:00.
