Takimi prej 3 orësh, në zyrën e presidentit Nishani, midis kryeministrit Edi Rama dhe kryedemokratit Lulzim Basha nuk ka sjellë asnjë rezultat konkret për të arritur në një marrëveshje midis palëve.
Sipas burimeve nga Partia Demokratike, deri më tani, nuk ka asnjë konsensus midis mazhorancës dhe opozitës. Kjo ka ardhur për faktin se kryeministri Rama nuk pranon kërkesën e Bashës për krijimin e një qeverie teknike që do të organizonte zgjedhjet parlamentare.
Në takimin e zhvilluar me praninë e kreut të shtetit, merrnin pjesë krerët e grupeve parlamentare të Partisë Socialiste dhe Partisë Demokratike, respektivisht Gramoz Ruçi dhe Edi Paloka.
Pas takimit që zgjati për rreth 3 orë, i pari që la Presidencën ishte kryeministri Rama i shoqëruar nga Gramoz Ruçi. Ndërsa kreu i opozitës, Lulzim Basha, bashkë me kreun e grupit parlamentar, Edi Paloka, vijon të qëndrojë në zyrën e presidentit Nishani.
