Një tjetër rast i abuzimit seksual të fëmijëve, u raportua dje në Gjirokastër. Familjarët e 16 vjeçares denoncuan ngjarjen tronditëse, teksa dyshohet të jetë përdhunuar nga një i afërm i familjes për një periudhë rreth 4-vjeçare. E mitura ka rrëfyer ngjarjen shokuese ditën e mërkurë, dhe pas kallëzimit në polici, 53-vjeçari i identifikuar si Kabul Hunda është vënë në pranga.
Vajza kishte vendosur që ti rrëfente të vërtetën nënës së saj, ndërsa ndodhej në gjendje të rënduar shëndetësore për shkak të hemorragjisë për ditë të tëra. E ëma e vajzës menjëherë ka bërë denoncimin në Komisariatin e Policisë. Ajo në një prononcim për mediat ka thënë se përgjatë këtyre viteve, nuk e ka kuptuar që vajza e saj abuzohej seksualisht nga 53- vjeçari.
Ajo theksoi se Kabul Hunda, i cili është xhaxhai i bashkëshortit të saj, kishte hyrje-dalje në shtëpinë e tyre. Mësohet se 53-vjeçari ishte kthyer pak kohë më parë nga Greqia, pas vdekjes së të shoqes dhe jetonte vetëm, ndërsa ka një vajzë mbi 20 vjeçe. Të dyja familjet janë në gjendje të keqe ekonomike, ndërsa prindërit e vajzës janë me probleme shëndetësore. Duke shfrytëzuar këto rrethana, dyshohet se 53-vjeçari ka krijuar lidhje intime me të miturën kur ajo ishte vetëm 12 vjeçe.
E gënjeu vajzën me anë të dhuratave
53-vjeçari i jepte herë pas here dhurata vajzës, që kur ishte në moshën 12-vjeçare. Madje, ai i kishte blerë edhe një telefon celular. Për shkak edhe të lidhjeve familjare, duket se 53-vjeçari ka përfituar nga afrimiteti i familjeve për të abuzuar me vajzën që në moshë fare të vogël. Aktualisht vajza po ndjek gjimnazin në qytezën e Libohovës.
Rrëfimi tronditës i nënës së vajzës/ Intervista
Po ju nuk kishit kuptuar gjë?
Fare.
Kush jua tregoi?
Vetë vajza.
Çfarë tha vajza?
Vajza tha që kështu kështu ma bëri. Për herë të parë e kishte dhunuar te shtëpia e tij.
Çfarë e ke këtë burrin?
Xhaxhanë e burrit, i ka vdekur gruaja dhe jetonte vetëm. Nuk e di se si e kishte bindur për herë të parë vajzën se ajo ishte e vogël, edhe unë dridhem tani. Vajza më tha vetëm dje, nuk më shkonte mendja se e kisha xhaxhanë e burrit dhe thashë se na përkrahte.
A shkonte vajza shpesh te xhaxhai i burrit?
Vinte ai për kafe.
Ka kryer vazhdimisht marrëdhënie me vajzën. Si është gjendja e vajzës?
Shyqyr Zotit tani është shumë mirë. Vajza do të më kishte vdekur, është e katërta ditë sot që vetëm qan.
Ju si ndiheni?
Unë nuk e dua jetën time fare, kemi shumë frikë, trembemi se do të marrim një opinion shumë të keq.
