Nga Anxhela Ferra
E planifikuar të ndodhte në fillim të muajit, zhvendosja e autobusëve interurbanë të jugut dhe veriut, ka ndodhur në 12 janar. Ndërkohë kryebashkiaku Erion Veliaj u shpreh se terminali, i cili ndodhet në kthesën e Kamzës, do të jetë i përkohshëm. Por, i përhershëm sa i takon vendndodhjes; me ndryshime që priten të bëhen në të ardhmen, në bashkëpunim edhe me Ministrinë e Infrastrukturës.
“Është një hapësirë goxha më e madhe sesa ajo te ish-Dogana. Do të akomodojë 63 vend-poste dhe stacione për autobusët e veriut dhe të jugut. I kërkoj gjithë qytetarëve për pak bashkëpunim. Sidomos në këto ditë të para teksa ne bëjmë transferimin në këtë terminal provizor. Por, që në finale do të jetë edhe terminali përfundimtar si vendndodhje,” tha Veliaj disa ditë më parë.
Ndërsa më parë autobusët dhe furgonët interurbanë ishin të pozicionuar në zonën e ish-Doganës në terminale të ndryshme; tashmë ato janë bashkuar. Duke përfshirë linjën për veriun dhe atë të jugut. Por, duket se kjo gjë ka sjellë pakënaqësinë më të madhe te shoferët. Ata shprehen për Tirana Today se kjo gjë krijon një rrëmujë shumë të madhe dhe pengon lëvizjen e tyre.
“Me trafikun që kthehemi te zona e Treshit na shkon 40 minuta për të shkuar deri në Durrës. Ndërsa më parë ne e kemi bërë Doganë-Durrës, për 28 minuta. Është pak problem. Nëse do të ishte dalja përballë këtu te terminali, do të ishte një zgjidhje shumë e mirë. Për të gjithë dhe jo vetëm për mua, si linjë e Durrësit. Pasagjerët kanë shprehur pakënaqësi, sidomos për orarin. Sepse disave i shkon vonë për në unë, apo shkollë.”
“Ka shumë autobusë, është i ngushtë në fakt. Duhet të ketë një parkim për autobusët pak më tutje, në mënyrë që këtu të rrinë veç ato që kanë orarin. Duhet një dalje për ne të jugut që këtu. Pasi sa të shkojmë te rrethrrotullimi në Kamëz, të kthehemi prapë është shumë trafik. 30 minuta i humbasim në trafik. Është i gjithë veriu, jugu, po autobusët e Durrësit janë shumë të mëdhenj. Nuk merret vesh se kush hyn e kush del.”
“Këtu nuk ka parkim për mjetet që nisen në orare, mjetet qëndrojnë në trafik brenda në terminal. Dhe normalisht që ai qëndrimi shtesë përfshihet në pagesë. Këtu ka shumë rrëmujë. Nuk kanë zgjidhur asnjë gjë me këtë punë, vetëm kanë shtuar problemet. Gjithë Shqipërinë e kanë bërë në një vend. Ndaj edhe autobusët nuk kanë vend që të kthehen këtu. Ky nuk është një terminal, është një parkim i thjeshtë që duhet ta mbyllësh makinën në darkë dhe të ikësh. Nuk është terminal që të nisen udhëtarët, se ky i fundit nuk e gjen shoferin.”
“E presim biletën për të qëndruar për 30 minuta apo për një orë; por duke qenë se ka kaos të madh e kalon orarin. Kështu kalon edhe pagesa, ajo shtohet. Duhen kushtet minimale, duhet ujë, banjë sepse njerëzit nuk kanë ku të shkojnë. Një kioskë, disa mbrojtëse edhe për shiun edhe për diellin. Por, edhe ndonjë stol ku të ulen njerëzit.”
Mirëpo, kjo rrëmujë e shprehur nga shoferët, duket se shqetëson edhe pasagjerët. Ata shprehen për Tirana Today se e kanë të vështirë të gjejnë linjën me të cilën do të udhëtojnë. Po ashtu një problem është qëndrimi në trafik për shumë kohë.
“Ne tani erdhëm dhe po kërkojmë autobusin e Beratit. Ne jetojmë në Greqi dhe me çfarë po shohim këtu është shumë rrëmujë. Andej nuk është kështu, është si nata me ditën. Këtu nuk ka as orientim, asnjë gjë. Atje i ke të gjitha nëpër vendet e caktuara, shkon direkt te linja. Edhe nëse nuk e gjen, ke orientuesin atje që të ndihmon. Këtu është të rrish vërdallë dhe të shohësh se kush bërtet për të shkuar te autobusi.”
“Për ibret të Zotit, shumë keq është. Trafiku është shumë keq, banjë publike nuk ka. Ky stacion në çdo drejtim është shumë keq. Më copë-copë nuk ka ku të shkojë.”
“Hallakatemi shumë, hip këtu e zbrit diku tjetër, ndërro nga dy autobusë. Po shpenzime janë ato se ne pensionistë jemi. Këta më mirë të na e çojnë në Durrës terminalin.”
“Hera e parë që kam ardhur sot këtu, edhe më duket shumë dobët. Ka shumë rrëmujë, nuk ka një banjë, nuk ka një kioskë. Me qëllim të marrim një ujë a të marrim diçka për të ngrënë.”/ TIRANA TODAY
