Partia Demokratike ka refuzuar të dërgojë përfaqësuesin e vet në rolin e vëzhguesit në komisionin për Reformën Zgjedhore.
Sekretari i Përgjithshëm i PD-së, Gazment Bardhi shprehet se reforma duhet të realizohet e të zbatohet nga institucione apo parti që kanë vullnet për të garantuar zgjedhje të lira dhe të ndershme.
Sipas tij, Parlamenti është produkt i zgjedhjeve të diktuara dhe te blera nga krimi i organizuar, dhe se komisioni i Reformës Zgjedhore, njësoj si Parlamenti, nuk ka legjitimitet për realizimin e Reformës.
“Asnjë Komision që ka në përbërje dhe drejtim individë që duhet të ishin në burg për krime elektorale, nuk gëzon legjitimitetin për realizimin e Reformës Zgjedhore. Asnjë Komision që ka në përbërje dhe drejtim individë që nuk përfaqësojnë opozitën, nuk mund të përcaktojë rregullat për pjesëmarrje në zgjedhje të partive politike opozitare.’
Duke ritheksuar nevojën për Reformë të vërtetë Zgjedhore, PD shpreh bindjen se ajo duhet të realizohet e të zbatohet vetëm nga institucione apo parti që kanë vullnet për të garantuar zgjedhje të lira dhe të ndershme.
“Personat, subjekt i hetimeve penale nr. 184/2016 apo nr. 339/1/2017 të Prokurorisë për Krimet e Rënda, janë në kushtet e konfliktit të interesit me zgjedhjet e lira dhe të ndershme, si dhe me Reformën e vërtetë Zgjedhore, për të cilën ka nevojë vendi”, thuhet në përgjigjen e PD.
