Partia Demokratike ka reaguar pas betimit të qeverisë “Rama 3” në Presidencë. Deputetja Orjola Pampuri, është ndalur tek fjala e kryeministrit Rama, ku foli për etikën e ministrave. Rama në fillim të mbledhjes së parë të Qeverisë në këtë mandat të tretë, e ka vënë theksin te domosdoshmëria e hartimit të një aneksi të Kodit Etik të Këshillit të Ministrave.
Rama tha se Qeveria ka një kod etik që është mënyrë jetese e një ministri. Pampuri shprehet se kjo etikë nuk është zbatuar ndonjëherë as nga qeveritë e mëparshme të Ramës, dhe lidhur me këtë ka përmendur edhe raste konkrete.
Reagimi i deputetes:
Propaganda bajate e qeverisë më të korruptuar në Ballkan, i darkave te Nusreti dhe hoteleve 700 euro nata, shfaq si risi kodin e etikës që qysh prej 2013-ës përdori për t’u hedhur hi syve, qytetarëve. Të gjithë e mbajmë mend me sa ‘etikë’ u ngrit sistemi nepotik në qeveri, me sa ‘etikë’ vëllezër e kushërinj ministrash gëzuan paprekshmërinë për t’u kthyer në zota të drogës dhe trafiqeve, duke dëshmuar se fjalët e shumta mbi etikën fshihnin pikërisht mungesën e saj, pasi si atëhere edhe tani, PPP-ja Rama, Doshi, Rakipi, bashkëqeverisjen, e ka me krimin dhe kundër interesave të shqiptarëve.
