PD ka paditur Drejtorin e Përgjithshëm të Policisë, Ardi Veliu për 5 vepra penale, pas ekzekutimit nga policia të një të riu 25-vjeçar. Kërkesa e Partisë Demokratike i është drejtuar Prokurorisë së Posaçme, SPAK, që duhet të kërkojë pezullimin e Ardi Veliut nga detyra deri në përfundimin e hetimeve.
“Në padinë e dorëzuar në SPAK, Partia Demokratike argumenton me detaje sesi Ardi Veliu ka shkelur ligjin, duke kryer të pesta veprat penale, si:
1. Shpërdorim i detyrës
2. Kryerja e veprimeve arbitrare
3. Pengimi në të drejtën për t’u shprehur, grumbulluar dhe manifestuar
4. Dëmtime të tjera me dashje
5. Mosmarrja e masave për të ndërprerë gjendjen e paligjshme.
Në padinë penale ndaj Drejtorit të Përgjithshëm të Policisë, Partia Demokratike vë në dukje se “në protestat paqësore për të kundërshtuar frymën e represionit policor dhe të abuzivizmit qeverisës, është vënë re përdorim i tepruar i dhunës policore, përdorimi në mënyrë të çmendur i gazit lotsjellës. Ai është hedhur në sasi shumë të mëdha në Bulevard dhe në zonat rezidenciale me densitet të lartë qytetarësh, që nuk ishin pjesë e protestës”.
Duke i vënë në dispozicion SPAK-it fakte konkrete, në padi theksohet se, me urdhër të Ardi Veliut, është ushtruar dhunë barbare ndaj të miturve, kanë ndaluar në mënyrë abuzive çdo njeri që lëvizte në rrugë, pa qenë pjesë e protestës.
“Me anë të këtij kallëzimi, marrim përsipër të bëhemi përçues të zërit të atyre qytetarëve të ndershëm të këtij vendi, të cilët besojnë se ligji është një dhe i barabartë për të gjithë dhe që ende kanë shpresën se vetëm zbatimi i Ligjit do ta çojë drejt përsosjes shoqërinë tonë.”- i drejtohet Partia Demokratike SPAK-ut, duke i kërkuar marrjen nën hetim të Drejtorit të Përgjithshëm të Policisë, Ardi Veliu dhe pezullimit të tij nga detyra.
Ndryshe nga ditët e tjera, numri i protestuesve në protestën e djeshme ishte më i madh, ndërsa protesta u zhvillua si një marshim paqësor, ndryshe nga ditët e tjera ku pati dhunë dhe sulme ndaj institucioneve.
Protestuesit vijuan protestën drejt Drejtorisë së Policisë, nga ku nuk janë lejuar të hyjnë në rrugën e Drejtorisë së Policisë, pasi FNSH ka krijuar një kordon në fillim të rrugës, duke mos lejuar kalimin e protestuesve.
Sapo protestuesit janë afruar, është hedhur gaz lotsjellës dhe ujë për shpërndarjen e protestuesve. Teksa disa protestues kanë tentuar të kalojnë rrugën, FNSH ka shoqëruar disa protestues, gjë e cila bëri që të ketë tensione. Ndërkohë protestuesit vijuan edhe sulmet ndaj tabelave dhe semaforëve në rrugët e kryeqytetit, por që ishin sporadike.
