Sekretari i Përgjithshëm i Partisë Demokratike, Gazment Bardhi në një takim me anëtarë të rinj të PD në degën nr.7 në Tiranë tha se për sa kohë që kryeministri Rama të jetë në pushtet dera e Bashkimit Europian do të jetë e mbyllur.
“PD e ka kuptuar se me Edi Ramën dhe qeverisjen e tij të korruptuar e kriminalizuar nuk negociohet. Për sa kohë që Rama është në qeveri, dera e BE është e mbyllur për Shqipërinë. Ne kemi lindur si parti që e duam Shqipërinë si Europa dhe ky nuk është një slogan”, tha Bardhi.
Ndër të tjera, Bardhi u shpreh se qeveria e Ramës ka lidhje me krimin e organizuar, ndërsa shtoi se pa u garantuar zgjedhje të lira e të ndershme, nuk mund të ketë as qeveri normale.
“Qeveria e Ramës ka lidhje me krimin e organizuar. Pa zgjedhje të lira e të ndershme nuk garantohet dot as proces zgjedhor normal, as qeveri normale, që do iu shërbente realisht njerëzve dhe jo bandave kriminale. Në zgjedhjet e 2015 dhe 2017 nuk janë pyetur njerëzit, por votat janë vjedhur e grabitur”, deklaroi Bardhi.
