Mblidhet kryesia e PD-së për ndryshimet në Statut, si dhe zgjedhjen e anëtarëve të rinj të Këshillit Kombëtar. Mbledhja do të zhvillohet të enjten, ndërkohë që deri të martën e 13 korrikut, do të priten propozimet për ndryshimet që do të miratohen në Kryesinë e PD-së. Lajmi është bërë i ditur nga Sekretari i Përgjithshëm i PD, Gazment Bardhi, i cili ka njoftuar anëtarët se mbledhja do të zhvillohet më 15 korrik në orën 18:00.
Ja mesazhi që Sekretari i Përgjithshëm i PD, Gazment Bardhi, iu ka dërguar anëtarëve të Kryesisë.
Të nderuar anëtarë të Kryesisë,
Ditën e enjte, datë 15.07.2021, ora 18:00 do të zhvillohet mbledhja e Kryesisë së Partisë, me këtë rend dite:
- Shqyrtimi i përmbledhjes së analizës së masakrës zgjedhore të 25 Prillit, për fazën e parë të saj.
- Shqyrtimi i ndryshimeve në Statutin e Partisë Demokratike që do ti propozohen për miratim Kuvendit Kombëtar të Partisë, në mbledhjen e tij të datës 17 Korrik 2021.
- Miratimi i urdhrit për ngritjen e Komisioneve të Votimit dhe Numërimit për zgjedhjet e anëtarëve të Këshillit Kombëtar në mbledhjen e datës 17 Korrik 2021 të Kuvendit Kombëtar.
- Njoftimi nga Kryetari i Partisë i listës që do të propozojë për votim për kandidatët për anëtar të Këshillit Kombëtar.
Të mërkurën, datë 14.07.2021, orën 11:00, do të zhvillohet mbledhja e Komisionit të Përhershëm Statutor, për të shprehur mendimin e tij për propozimet që do të vijnë deri të martën, datë 13.07.2021, nga anëtar të Komisionit, anëtar të Kryesisë, Kryetari i Partisë, anëtar të Këshillit Kombëtar, apo strukturat lokale të Partisë.
Duke ju uruar punë të mbarë,
Sekretari i Përgjithshëm
Gazment Bardhi