Partia Demokratike dhe Lëvizja Socialiste për Integrim duket se kanë hyrë në një luftë të ftohtë me njëra-tjetrën. Gazeta e deklaroi pak ditë më parë se përplasjet dhe divergjencat brenda opozitës janë shtuar ndjeshëm, por këto sherre kanë arritur kulmin ditët e fundit. Shkak është bërë mungesa e një koalicioni. Sipas informacioneve, mësohet se LSI po ushtron presion ndaj PD, duke kërkuar me ngulm që këto dy parti të nënshkruajnë një koalicion zyrtar. Në këtë kontekst, mësohet se Lëvizja Socialiste për Integrim kërkon zyrtarizimin e koalicionit, me arsyetimin që të jenë të barabartë si para, ashtu edhe pas zgjedhjeve, duke qenë se ka zëra se vendi do të shkojë në zgjedhje të parakohshme, tezë kjo e besuar fort nga partitë e opozitës.
Por deri më tani nuk ka tym të bardhë nga selia blu, duke treguar qartë se Partia Demokratike po e mban peng partinë e Kryemadhit për koalicionin. Ndërkohë, gazeta u interesua pranë PD, zyrtarët të së cilës pohuan se një nga arsyet që Basha dhe Kryemadhi nuk kanë nënshkruar ende një koalicion është fakti që kryedemokrati ndodhet midis dy zjarreve.
Nga njëra anë janë aleatët tradicionalë të tij, të cilët pak ditë më parë kanë propozuar që PR, PAA, PDK, PR dhe LZHK të hyjnë si nënkoalicion brenda koalicionit të madh në zgjedhjet e ardhshme, pasi këto parti i frikësohen faktit që votat ua vjedhin partitë e mëdha. Me Kodin aktual Zgjedhor, votat e partive të vogla i shkojnë partisë së dytë më të madhe të koalicionit, që në rastin konkret është LSI, nëse supozojmë që partitë opozitare do të hyjnë në një koalicion të vetëm në zgjedhje. Kështu që Basha është vënë përpara presionit të aleatëve të tij.
Ndërsa, arsyeja tjetër që ka ndikuar tek kryedemokrati Basha, i cili po mban “peng” LSI-në për koalicionet, është edhe kundërshtitë që kanë zyrtarët e lartë të Partisë Demokratike, të cilët këmbëngulin se me Lëvizjen Socialiste për Integrim i bashkon vetëm fakti se kanë një “armik” të përbashkët, që është qeveria me në krye kryeministrin Edi Rama. Pra, të gjitha këto tregojnë se PD po mban “peng” LSI për koalicionet.
Plas konflikti edhe për reformën zgjedhore
Interesant është fakti se mes Partisë Demokratike dhe Lëvizjes Socialiste për Integrim ka plasur një konflikt edhe sa i takon reformës zgjedhore, çështje kjo që është bërë objekt diskutimi gjatë ditëve të fundit. Demokratët i kanë propozuar disa kërkesa mazhorancës socialiste, sikundër është bërja me ligj që 100 ditë para çdo palë zgjedhjeve të ngrihet një qeveri tranzitore. Për selinë blu kjo kërkesë duhet të miratohet brenda 15 marsit, afat ky i fundit që është vënë sa i takon komisionit të reformës zgjedhore, pasi në të kundërt opozita do t’i rikthehet protestave. Por gazeta ka mësuar se ky kusht i PD nuk është konsultuar me LSI, ndërkohë që këtë konflikt midis këtyre dy forcave politike i vuri kapak edhe fakti që kërkesën e demokratëve e lançuan tre zyrtarë të Partisë Demokratike dhe jo bashkërisht sikundër kanë dalë herë të tjera PD dhe LSI. Po ashtu, mësohet se Partia Demokratike dhe Lëvizja Socialiste për Integrim ndahen me njëra-tjetrën edhe sa i takon çështjes së financimit të partive. Partia e Kryemadhi kërkon që sistemi i financimit të jetë miks dhe jo i prerë 100% nga shteti, ndërsa PD kërkon që financimi të mbulohet nga buxheti i shtetit. /Gazeta SOT
