Partia Demokratike vijon betejën e saj ligjore, për rezultatin e zgjedhjeve parlamentare të 25 prilit. Ditën e sotme, kjo forcë politike ka ankimuar në Kolegjin Zgjedhor, vendimin e KAS për qarkun e Shkodrës.
PD kërkon pavlefshmëri të zgjedhjeve në këtë qark, për shkak të parregullsive të raportuara në KAS. Gjithashtu, sipas PD, zgjedhjet në qarkun e Shkodrës duhet të përsëriten.
Kolegji Zgjedhor ka vendosur që ta shqyrtojë ankimimin të premten më 10 qershor në orën 11:00. Më herët, Kolegji Zgjedhor ka rrëzuar paditë e PD dhe LSI për shpalljen e pavlefshme të zgjedhjeve të 25 prillit në Vlorë dhe në Gjirokastër.
Pak ditë më parë, KAS rrëzoi kërkesën e PD-së për të shpallur pavlefshmëri ne zgjedhjet e 25 prillit në qarkun e Shkodrës.
Zgjedhjet parlamentare të 25 prillit, u fituan nga Partia Socialiste, e cila siguroi 74 mandate. Partia Demokratike doli e dyta në këto zgjedhje, me 59 mandate.
LSI pati një tkurrje të madhe, pasi mori vetëm 4 mandate nga 19 të cilat i fitoi në zgjedhjet e 2017. Ndërkohë, surprizë mund të konsiderohet PSD e Tom Doshit, e cila siguroi 3 mandate.
